Өзбекстан Республикасы Президенті Шавкат Мирзияев 30 желтоқсанда Түркіменстан Республикасы Президенті Гурбангулы Бердімұхамедовпен телефон арқылы сөйлесті.

Сұхбат басында Өзбекстан мен Түркіменстан Президенттері бір-бірін кіріп келе жатқан жаңа 2021 жылмен шын жүректен құттықтап, бауырлас екі елдің халқына бейбітшілік пен өркендеу тіледі.  

Коронавирустық пандемиядан туындаған жаһандық дағдарыстың салдарына қарамастан, Өзбекстан мен Түркіменстан ғасырлар бойғы достық, тату көршілік, өзара сыйластық пен сенім, ортақ тарихи, мәдени және рухани құндылықтарға негізделген стратегиялық серіктестікті нығайтуда үлкен жетістіктерге жеткені айтылды.

Мемлекет басшылары 2021 жылы көпжақты ынтымақтастықты кеңейтудің бірлескен жоспарларын, сондай-ақ екіжақты қатынастар мен халықаралық құрылымдар, атап айтқанда, БҰҰ шеңберіндегі болашақтағы іс-қимылдар жоспарын егжей-тегжейлі талқылап, сауда, өнеркәсіп, ауылшаруашылық және көлік саласындағы ынтымақтастықты кеңейтуге және келер жылы іскерлік және мәдени іс-шаралардың бай бағдарламасын жүзеге асыруға келісті.

Жаңа жылда өтетін келесі Орталық Азия Саммитіне дайындық мәселелері де сөз болды.