Қалдықтарды дұрыс басқару және қайта өңдеу бүгінгі таңда экологиялық тұрақтылықты қамтамасыз етудің, қоршаған ортаны қорғаудың әрі экономикалық ресурстарды тиімді пайдаланудың маңызды факторларының бірі саналады.

Халық саны мен өндіріс көлемінің артуына байланысты қалдықтар мөлшері де жылдан жылға көбейіп келеді. Осыған орай, заманауи технологияларды енгізу, циркулярлық экономика қағидаттарын дамыту және халықаралық тәжірибені кеңінен қолдану арқылы бұл саланы жаңа деңгейге көтеру өзекті міндетке айналып отыр.

Белгілі болғандай, Мемлекет басшысының Түркия Республикасына жасаған ресми сапары аясында екіжақты көпқырлы ынтымақтастықтың перспективалы бағыттары бойынша бірқатар келісімдерге қол жеткізілді.

Аталған келісімдер Өзбекстанда экология саласында жүзеге асырылып жатқан реформаларды қолдауға бағытталған.

Атап айтқанда, Экология және климаттың өзгеруі комитетіне қарасты Қалдықтарды басқару және циркулярлық экономиканы дамыту агенттігінің директоры Шарифбек Хасанов бастаған делегация Түркияның «MT Makina» компаниясымен қалдықтарды қайта өңдеу және басқару саласында жабдықтар өндіру, сұрыптау және қайта өңдеу нысандарын құру мәселелері бойынша келіссөздер жүргізді.

Келіссөздер нәтижесінде Самарқанд облысында жалпы құны 10 миллион АҚШ долларын құрайтын жобаларды іске асыру жоспарланып отыр. Негізгі жобалар 2026–2027 жылдарға межеленген. Атап айтқанда, тәулігіне 500 тонна қуаттылыққа ие қалдықтарды сұрыптау станциясын салу және жылына 1000 дана арнайы техника мен контейнер өндіретін зауытты жергіліктендіру көзделген.

Бұл бастамалар аясында 100 жаңа жұмыс орны ашылады. Сондай-ақ жобалардың жалпы қызмет ету мерзімі 20 жыл болып белгіленген.

Айта кету керек, «MT Makina» компаниясы қалдықтарды басқару саласында 20 жылдық тәжірибеге ие және заманауи технологиялық шешімдерді ұсынып келеді. Түркияға жасалған сапар барысында аталған ынтымақтастықты одан әрі жандандыру және бірлескен жобаларды кеңейту мәселелері де талқыланды.