Өзбекстан Республикасы мен Швеция Корольдігі еңбек миграциясы саласындағы өзара іс-қимылды кеңейтеді.

Бұл туралы Өзбекстан Миграция агенттігінің директоры Бехзод Мусаев пен Швецияның миграция істері жөніндегі министрі Йохан Форсселлдің кездесуі барысында мәлім болды.

Кездесуде заңсыз миграцияның алдын алу, адам құқықтарын сақтайтын, қауіпсіз әрі ашық еңбек миграциясы жүйесін қалыптастыру мәселелері талқыланды.

Бүгінде Швецияда демографиялық өзгерістерге байланысты құрылыс, көлік-логистика, медицина, білім және қызмет көрсету салаларында маман тапшылығы сезіліп отыр. Өзбекстан бұл елдің еңбек нарығына қажетті білікті кадрларды дайындауға толық әлеуетке ие екені атап өтілді.

Тараптар бірнеше маңызды бастамаларды ұсынды, соның ішінде:

• Екі ел арасында орталықтандырылған сандық платформа құру;
• Құрылыс, логистика және медициналық қызмет салалары бойынша жұмыс берушілердің сұранысына сәйкес өзбекстандық кадрларды оқытып, оларды Швецияда еңбекпен қамтуға бағытталған пилоттық жобаларды іске қосу.

Сонымен қатар, кездесу аясында миграция және еңбек миграциясы бойынша бірлескен декларацияға қол қойылды. Құжат заңсыз көші-қонның алдын алу, ақпарат алмасу және консулдық қолдау тетіктерін нығайтуға бағытталған.

Швеция миграция министрі Йохан Форсселл бұл келісімді тарихи құжат деп бағалап, «Бүгін қол қойылған тарихи келісім Өзбекстан мен Швеция арасындағы қатынасты жаңа деңгейге көтеріп, келешектегі белсенді әріптестіктің берік негізіне айналмақ. Елдеріңізге алғаш келсем де, қарқынды дамып жатқан экономика мен барлық саладағы оң мүмкіндіктер менде ерекше әсер қалдырды», деген ол.

Бұл келісім Өзбекстан азаматтарының Еуропа елдеріндегі заңды және қауіпсіз еңбекке орналасу жолдарын кеңейтумен қатар, екіжақты экономикалық байланыстарды тереңдетуге де серпін бермек.