Өзбекстан мен Қытай гид-аудармашыларды даярлау туралы келісімге қол қойды.

Туризм комитетінің хабарлауынша, Өзбекстанның туризм комитетінің төрағасы Умид Шодиев Қытайға сапары барысында Бейжің халықаралық зерттеулер университетінің президенті Жи Жимбаомен кездесті.

Кездесуде Өзбекстанда туризм саласы бойынша кадрлар даярлау жобаларын жүзеге асыру және бірлескен ғылыми зерттеулер жүргізу мәселелері талқыланды.

«Тараптар студенттер мен оқытушылар алмасу бағдарламаларының санын көбейту, сондай-ақ «жасыл» және креативті экономика бойынша ғылыми зерттеулер, қытай тіліндегі гид-аудармашыларды даярлау туралы келісті», делінген хабарламада.

Сұхбат соңында барлық көрсетілген бағыттарды қамтитын ынтымақтастық туралы меморандумға қол қойылды.

Бейжің халықаралық зерттеулер университеті 1964 жылы құрылған және туризм саласындағы ғылыми және практикалық зерттеулер бойынша Қытайдағы үздік 3 оқу орнының бірі болып табылады.