Кейінгі уақытта Өзбекстан мен Қытай электр техникасы және жоғары технологиялар саласындағы әріптестікті дамытып келеді. Әсіресе, дисплей технологиялары, электрондық компоненттер өндіру мен технология трансфері бағыттары екі елдің өнеркәсіптік ынтымақтастығын нығайтуда маңызды рөл атқаруда.

Осы бағыттағы келешегі зор серіктестіктің кезекті қадамы ретінде Қытайдың Шанхай қаласында өтіп жатқан «Shanghai International Display Innovation Expo – 2025» халықаралық көрмесі ерекше маңызға ие.

Аталған беделді шарада дисплей технологиясы саласындағы әлемдік деңгейдегі жетістіктер, заманауи шешімдер мен әріптестік мүмкіндіктері ұсынылуда. Көрмеге Өзбекстаннан «UzEltexSanoat» қауымдастығының өкілдері де белсенді қатысуда.

Қауымдастық мәліметінше, көрме аясында қауымдастық төрағасы Мирзиёд Юнусов бастаған жұмыс тобы Қытайдың оптоэлектроника саласының өкілдерімен бірқатар кездесулер өткізді. Атап айтқанда, Қытай Оптоэлектроника өндірушілері қауымдастығы (KODA) басшылығымен өткен сұхбат барысында Өзбекстанда дисплей панельдерін өндіру бойынша бірлескен жобалар қолға алу туралы ұсыныстар айтылды.

Сондай-ақ делегация дисплей мен электрондық компоненттер өндірісінде жетекші саналатын TCL және HKC компанияларымен бастапқы келіссөздер жүргізді. Әңгіме барысында ықтимал инвестициялық жобалар, технология трансфері және бірлескен өндірісті дамыту мәселелері талқыланды.

Жұмыс сапары аясында тараптар өзара тиімді ынтымақтастықты жеделдету мақсатында жол картасын әзірлеуге уағдаласты. Бұл құжат жобаларды нақты іске асыру мерзімдерін, тараптардың міндеттемелерін және қажетті инфрақұрылымдық қолдауды қамтитын болады.

Қауымдастықтың баспасөз қызметі атап өткендей, бұл сапар нәтижесінде электр техникасы өнеркәсібінде жоғары қосылған құны бар өнімдерді шығару, жаңа жұмыс орындарын ашу және ұлттық экспорт әлеуетін арттыруға бағытталған келешегі мол бастамалар жүзеге асырылады деп күтілуде.