Өзбекстан азаматтары үшін Қытайға визасыз саяхат жасау мүмкіндігі ашылды.

Бұл туралы Өзбекстанның Сыртқы істер министрі Бахтиёр Саидов мәлімдеді. Қос елдің сыртқы істер министрлері арасында тиісті келісімге қол қойылды.

«Өзбекстан және Қытай көшбасшылары арасында жасалған келісімдерді жүзеге асыру аясында бүгін әріптесіммен бірге азаматтарымызға екі ел аумағында 30 күн бойы визасыз саяхат жасауға мүмкіндік беретін келісімге қол қойдық», – деп жазды Саидов өзінің Телеграмм арнасында.

Министрдің айтуынша, бұл құжат екі ел арасындағы байланыстарды жандандыру, сауда айналымын арттыру және халықтар арасындағы қарым-қатынастарды дамыту жолындағы маңызды қадам саналады.

СІМ мәліметінше, аталған халықаралық келісім тараптар қажетті ішкі мемлекеттік рәсімдерді орындағаннан кейін күшіне енеді.