24 шілде күні Өзбекстан Республикасы Президенті Шавкат Мирзияев Қырғыз Республикасының Президенті Садыр Жапаровпен телефон арқылы сөйлесті.

Сұхбат басында Президент Садыр Жапаров Мемлекет басшысын туған күнімен шын жүректен құттықтап, бауырлас Өзбекстан халқына өркендеу мен гүлденуді тіледі.

Осы жылдың 11-12 наурызында Ташкентте өткен өзбек-қырғыз саммиті кезінде қол жеткізілген уағдаластықтарды іске асыру маңызды екендігі атап өтілді. Энергетика, көлік, машина жасау, фармацевтика және басқа да салалардағы бірлескен жобаларды жедел ілгерілетуге ерекше назар аударылды.

Жақында Ташкентте өткен Орталық және Оңтүстік Азияның өзара тәуелділігін нығайтуға арналған халықаралық конференцияның аймақта қауіпсіздік, тұрақтылық пен тұрақты дамуды қамтамасыз етуде маңызды рөлі сөз болды.

Сондай-ақ, тараптар алдағы іс-шаралардың жоспарларын, оның ішінде 6 тамызда Түркіменстанда Орталық Азия көшбасшыларының саммитін өткізу мәселесін талқылады.