Өзбекстан мен Қырғызстанның сыртқы істер министрлері екі ел шекарасының кейбір учаскелері туралы келісімге және Әндіжан (Кампирабад) су қоймасын бірлесіп басқару туралы келісімге қол қойды.

СІМ мәліметінше, 3 қараша күні Бішкек қаласында Өзбекстан Сыртқы істер министрі Владимир Норов пен Қырғызстан Сыртқы істер министрі Жээнбек Кулубаев бірнеше халықаралық келісімдерге қол қойды.

Тараптар Өзбекстан-Қырғызстан мемлекеттік шекарасының кейбір учаскелері туралы келісімге және Әндіжан (Кампирабад) су қоймасының су ресурстарын бірлесіп басқару туралы келісімге қол қойды.

Сонымен қатар Өзбекстанның Су шаруашылығы министрлігі мен Қырғызстан Ауыл шаруашылығы министрлігі жанындағы Су ресурстары қызметі арасында су шаруашылығы және басқа да мәселелер бойынша ынтымақтастық туралы келісімге қол қойылды.

Елдер арасындағы дипломатиялық қарым-қатынастардың орнағанының 30 жылдығын мерекелеу жөніндегі іс-шаралар жоспарын («Жол картасы») әзірлеу және бекіту туралы келісімге қол жеткізіліп, ірі инфрақұрылымдық және энергетикалық жобаларды жүзеге асыру, соның ішінде Қытай-Қырғызстан-Өзбекстан темір жолының құрылысы бөлек талқыланған.

«Алдағы жоғары деңгейдегі бірлескен іс-шараларды, соның ішінде Өзбекстан Республикасы Президенті Шавкат Мирзияевтің Қырғыз Республикасына мемлекеттік сапарын дайындауға ерекше назар аударылды» делінген хабарламада.

Сондай-ақ Сыртқы істер министрлерінің Бірлескен мәлімдемесі және Өзбекстан Республикасы мен Қырғыз Республикасы сыртқы саяси ведомстволары арасындағы 2023-2024 жылдарға арналған ынтымақтастық бағдарламасы қабылданды.