Қырғыз Республикасы Министрлер Кабинетінің Төрағасы – Президент Әкімшілігінің Басшысы Ақылбек Жапаровтың Өзбекстанға ресми сапары аясында 9 наурызда Ташкентте Өзбекстан Республикасының Премьер-Министрі Абдулла Ариповпен кездесу өтті.

Екі Мемлекет басшыларының берік саяси ерік-жігері, жеке бастамалары, бірлескен күш-жігерінің арқасында ғасырлар бойы қалыптасқан тату көршілік пен достық қарым-қатынастар сапа жағынан мүлде жаңа деңгейге көтерілді.

Өзбекстан Республикасының Президенті Шавкат Мирзиёевтің үстіміздегі жылдың 26-27 қаңтарында Қырғызстанға мемлекеттік сапары барысында Қырғыз Республикасының Президенті Садыр Жапаровпен өткізген келіссөздері екіжақты қарым-қатынастардағы тарихи оқиға болды.

Жоғары деңгейдегі сапар барысында қол жеткізілген келісімдер өзара тиімді ынтымақтастықты одан әрі дамытудың жаңа мүмкіндіктерін ашып, оны жан-жақты стратегиялық әріптестік деңгейіне жеткізді.

Үкімет басшылары бастаған үкіметтік делегациялардың отырысында барлық келісімдер мен қол қойылған құжаттардың уақтылы әрі сөзсіз орындалуын қамтамасыз ету басты міндет екені баса айтылды.

[gallery-10913]

Өзбек-қырғыз қарым-қатынасының маңызды бағыты экономикалық ынтымақтастық екені белгілі.

Кейінгі 6 жылда сауда көлемі 7 есеге артып, 2022 жылдың соңына қарай 1,3 миллиард долларға жетті.

Мемлекет басшылары үкіметтерге алдағы бірнеше жылда өзара тауар алмасу көлемін 2 миллиард долларға жеткізу міндетін қойды.

Сауда, көлік-логистика, ауыл шаруашылығы, энергетика, электротехника, автомобиль өнеркәсібі, тоқыма бұйымдары, құрылыс материалдары, мәдени-гуманитарлық және басқа да көптеген салалардағы ынтымақтастықты одан әрі дамыту маңызды екені атап өтілді.

Өзбекстанға ресми сапары аясында Қырғызстан үкіметінің делегациясы Ташкенттегі бірқатар өнеркәсіптік және өндірістік нысандардың қызметімен танысты.

Кездесу қорытындысы бойынша бірқатар құжаттарға қол қойылды.