20-21 желтоқсанда Ташкентте Өзбекстан-Қазақстан қатынастарының құқықтық негіздерін түгендеу және жетілдіру мәселелері бойынша екі елдің сыртқы саясат ведомстволары арасында кезекті консультациялар өтті.

«Dunyo» агенттігінің хабарлауынша, шара Өзбекстан мен Қазақстанның сыртқы істер министрліктері арасында қол қойылған 2022-2023 жылдарға арналған (2022 жылғы 14 шілде) ынтымақтастық бағдарламасын жүзеге асыру аясында ұйымдастырылды.

«Тараптар ағымдағы шарттық-құқықтық базаның бүгінгі жай-күйін, сондай-ақ тараптарды қызықтыратын салалардағы екіжақты ынтымақтастықтың құқықтық негіздерін жаңарту және кеңейту мәселелерін талқылады. Сондай-ақ, екі елдің халықаралық келісімдерді жасау және жүзеге асыру тәжірибесіне назар аударылды», делінген хабарламада.

Басылым дерегінше кездесуде Халықаралық шарттарды жариялау және олардың бірыңғай электронды есебін жүргізу және мұрағаттау тәртібі туралы пікір алмасылып, консультациялардың қорытындысы бойынша тиісті хаттамаға қол қойылды.