Өзбекстан мұсылмандары басқармасының төрағасы, мүфти шейх Нуриддин Халиқназар Қазақстан мұсылмандары басқармасының төрағасы, Бас мүфти Наурызбай қажы Тағанұлымен кездесті.

Өзбекстан мұсылмандары басқармасы баспасөз қызметінің хабарлауынша, сұхбат барысында мәртебелі шейх Нуриддин Халиқназар Қазақстан Бас мүфтиі Наурызбай қажыға Ташкент, Бұхара қалаларында өткен беделді іс-шаралар мен халықаралық конференцияларға белсене қатысқаны үшін алғысын білдіріп, халықаралық форумда қазақ ғұламаларының шарадағы қатысуын жоғары бағалады.

Кездесуде Өзбекстан тарапының Түркі мемлекеттері ұйымының Мұсылман діни басқармалары басшылары кеңесінде пәтуа тобын құру туралы ұсынысының практикалық маңызы зор екені баса айтылды. Бұл комитеттің жаһандық мәселелер бойынша пәтуа әзірлеу, пәтуа кеңселерінің қызметін үйлестіру сияқты маңызды істермен айналысатындығымен ерекше екеніне назар аударылды.