Өзбекстан мен Қазақстан СІМ басшылары 2024-2025 жылдарға арналған ынтымақтастық бағдарламасына қол қойды.

СІМ мәліметінше, 2023 жыл 17 тамызда Өзбекстан Республикасының Сыртқы істер министрі Бахтиёр Саидов Қазақстан Республикасы Премьер-Министрінің орынбасары – Сыртқы істер министрі Мұрат Нұртілеумен кездесу өткізді.

Тараптар жоғары деңгейде қол жеткізілген барлық уағдаластықтарды уақтылы орындауға, соның ішінде өзара сауда көлемін 10 миллиард АҚШ долларына дейін арттыруға ерекше назар аударды.

«Өзбекстан мен Қазақстан арасындағы қарым-қатынастар кейінгі жылдары бұрын-соңды болмаған деңгейге көтеріліп, өткен жылы одақтық қатынастар туралы декларацияға қол қойылғаны атап өтілді. Осы тұрғыда Өзбекстан мен Қазақстанның Сыртқы істер министрліктері барлық салалардағы тығыз ынтымақтастықты одан әрі тереңдету үшін қажетті күш-жігерді жұмылдыруға дайын екендігі расталды», делінген хабарламада.

Сұхбат барысында екі ел арасындағы көлік қатынасындағы пайдаланылмай жатқан әлеует, Орталық Азиядағы халықаралық транзит мүмкіндіктері, азық-түлік қауіпсіздігі, академиялық және білім алмасу, тұрақты даму, аймақтық өркендеу мен қауіпсіздік саласындағы ынтымақтастық мәселелері талқыланған.

Ведомство дерегінше, кездесу соңында сыртқы саяси ведомство басшылары өзара қарым-қатынастарды маңызды нәтижелермен байытуға бағытталған Өзбекстан мен Қазақстанның сыртқы істер министрліктері арасындағы 2024-2025 жылдарға арналған ынтымақтастық бағдарламасына қол қойды. Құжат Өзбекстан мен Қазақстанның жан-жақты күн тәртібіндегі барлық саланы қамтиды.