Өзбекстанның Пәкістандағы елшісі Алишер Тухтаев TCS көлік-логистика компаниясының басшысы Халид Аванмен кездесу өткізді.

Кездесу барысында Өзбекстанның логистикалық мүмкіндіктерін тиімді пайдалану, жаңа инфрақұрылымдық нысандар салу, жүк жеткізу тиімді бағыттарын қалыптастыру, саладағы ынтымақтастыққа шетелдік серіктестерді тарту мәселелері талқыланды.

Пәкістан өкілі Орталық және Оңтүстік Азия бағытындағы көлік-логистика операцияларын кеңейту тетіктерін әзірлеп жатқанын, сондай-ақ «Карачи», «Гвадар» және «Қасым» порттары мен Өзбекстан аймақтары арасындағы жүк тасымалы бойынша интеграцияланған логистикалық шешімдер дайындап жатқанын айтты. 

Сонымен қатар, кездесуде интеграцияланған логистикалық шешімдерге қол жеткізу үшін қолданыстағы инфрақұрылымдық нысандарды жаңғырту және жаңаларын салуды қаржыландыру, сондай-ақ логистиканы басқару үдерістерін цифрландыруға инвестиция салу қажеттігі атап өтілді.

Сондай-ақ, TCS басшысы Өзбекстан мен Пәкістан арасындағы әлеуметтік-мәдени байланыстарды тереңдету мақсатында бірыңғай жоба негізінде тарихи көлік музейін құруға дайын екенін білдірді.