Авиация саласы – заманауи экономиканың және көлік инфрақұрылымының ең басым бағыттарының бірі. Саланың тұрақты дамуы жоғары білікті мамандарды даярлау, озық технологияларды енгізу және ғылыми зерттеулерді жетілдірумен тығыз байланысты. Осы тұрғыдан алғанда, халықаралық серіктестік пен бірлескен білім беру бағдарламалары авиация кадрларының әлеуетін арттыруда ерекше маңызға ие.

Осыған орай Ташкент мемлекеттік көлік университеті басшылығының Корея Республикасына жасаған сапары барысында ынтымақтастық аясын кеңейтетін келісім жасалды.

Ташкент мемлекеттік көлік университеті мен Корея аэроғарыш университеті жетекшілері өткізген келіссөздерде екі оқу орны арасындағы әріптестікті нығайту, заманауи талаптарға сай білім беру және ғылыми-зерттеу мүмкіндіктерін дамыту мәселелері жан-жақты талқыланды.

Кездесу барысында «Әуе кемелерінің ұшу эксплуатациясы» бағыты бойынша «1+2+1» үлгісіндегі бірлескен білім беру бағдарламасы шеңберінде дайындық, ұшу тәжірибесі, оқу бағдарламаларын үйлестіру, оқытушылар алмасу және біліктілікті арттыру жүйесін іске асыру жөнінде келісімдер жасалды.

Сонымен қатар, «2+2» форматындағы бірлескен бағдарламалар аясында «Авиация менеджменті» және «Авиациялық логистика» мамандықтары бойынша академиялық бағдарламалар және оқыту форматы белгілі болды. Жоспарға сәйкес, аталған бағдарламалар 2026 жылдан бастап іске қосылады.

Сапар барысында университет басшылығы Корея аэроғарыш университетіндегі «Аэродинамикалық құбыр (жел тоннелі)» зертханасының ашылу салтанатына қатысты. Бұл зертхана студенттер мен жас зерттеушілерге заманауи технологиялар негізінде практикалық дағдыларды меңгеруге кеңінен мүмкіндік береді.

Тараптар бірлескен білім беру бағдарламалары, тағылымдамалар, ғылыми жобалар және академиялық алмасуды кеңейтуге бағытталған стратегиялық жоспарларды белгіледі. Бұл ынтымақтастық студенттерге сапалы білім алып, тәжірибесін шыңдауға және ғылыми зерттеулерге белсене араласуға жаңа мүмкіндіктер ашады.

Бұдан бөлек, Ташкент мемлекеттік көлік университеті делегациясы Оңтүстік Кореяда білім алып жатқан «Әуе кемелерінің ұшу эксплуатациясы» мамандығы студенттерімен кездесті. Кездесу барысында олардың оқу процесі, тұрмыс жағдайы және оқу үлгерімі зерделенді.

Университет баспасөз қызметінің хабарлауынша, осынау халықаралық серіктестік, бірлескен білім беру бағдарламалары мен заманауи зертханалар авиация саласына қажетті білікті кадрларды даярлауға серпін береді.