Өзбекстан Қорғаныс министрлігінің делегациясы Үндістанға іссапармен барды.

Министрлік дерегінше, Өзбекстан делегациясы Мадхья-Прадеш штатында орналасқан Үндістан Құрлық әскерлерінің жаяу әскер мектебінің қызметімен танысты.

Осы мектептің басшысы генерал-лейтенант Гаджендра Джошимен әңгімелесу барысында екі ел арасындағы достық қарым-қатынас, оның ішінде Қорғаныс министрліктері арасындағы өзара ынтымақтастық деңгейі жоғары бағаланды. Жыл сайынғы бірлескен «Достық» әскери оқу-жаттығулары, бірлескен жұмыс топтарының отырысы және басқа да іс-шаралар әскери саладағы ынтымақтастықты одан әрі кеңейтуге маңызды үлес қосып отырғаны атап өтілді.

«Гаджендра Джоши Үндістан Өзбекстанмен жан-жақты қарым-қатынастарды одан әрі дамытуға мүдделі екенін атап өтті. Ол сондай-ақ Қорғаныс министрліктері арасында келісілген тұрақты өзара сапарлар, оқу және тәжірибе алмасу жаттығуларын өткізудің маңыздылығын айтты», делінген хабарламада.

Өзбекстан делегациясының сапары барысында екі тарапты да қызықтыратын бірқатар мәселелер бойынша пікір алмасылды.