Химия өнеркәсібін дамыту және шетелдік импортқа тәуелділікті азайту мақсатында Өзбекстанда жүйелі жұмыстар жалғасуда. Бұл үдерісте халықаралық ынтымақтастық, әсіресе жетекші шетелдік компаниялармен әріптестік орнату аса маңызды орын алады.

Осы бағытта «Узбекнефтгаз» АҚ пен Үндістанның химия саласындағы беделді компаниясы Rossari Biotech Limited өкілдері арасында келіссөздер өтті.

Келіссөз барысында басты назар метилдиэтаноламин (MDEA) атты химиялық реагентті Өзбекстанда жергілікті өндіріс негізінде шығару мәселесіне аударылды. Аталған зат табиғи және өнеркәсіптік газдардан көмірқышқыл газы (CO₂) мен күкіртсутек (H₂S) сияқты қышқыл компоненттерді бөлу үшін кеңінен қолданылады. Қазіргі таңда Өзбекстан бұл өнімді тек шетелден импорттауға мәжбүр.

Rossari Biotech Limited өкілдері MDEA реагентін жергілікті шикізат негізінде өндіру, заманауи өндірістік қуаттарды іске қосу, жаңа жұмыс орындарын ашу және отандық мамандарды даярлау жөніндегі жоспарларымен бөлісті. Сонымен бірге, ішкі нарықты толық қамтамасыз етіп қана қоймай, өнімді шетел нарығына да экспорттау көзделіп отыр.

Кездесуде инвесторларға Өзбекстандағы еркін экономикалық аймақтар, олардың инфрақұрылымдық мүмкіндіктері, салықтық және кедендік жеңілдіктер, сондай-ақ мемлекет тарапынан көрсетілетін қолдау шаралары туралы жан-жақты ақпарат ұсынылды. Тараптар ұсыныстар мен мүмкіндіктерді саралай келе, нақты қадамдарды бірлесіп айқындауға және басым бағыттар бойынша әріптестікті нығайтуға уағдаласты.

«Узбекнефтгаз» АҚ баспасөз қызметінің хабарлауынша, Rossari Biotech компаниясымен жүзеге асырылып жатқан бұл серіктестік Өзбекстанда химиялық өнім өндірісінің әлеуетін арттырып қана қоймай, елдің технологиялық тәуелсіздігін қамтамасыз ету жолындағы маңызды қадам.

Бұл бастама тек экономикалық пайда әкеліп қоймай, өзбек ғылымы мен өндірісінің жаңа сатыға көтерілуіне де жол ашады. Ұзақ мерзімді перспективада жоба елдің экспорттық әлеуетін арттыруға сеп болмақ.