Өзбекстан мен Малайзия цифрлы даму және инновациялар саласындағы әріптестікті кеңейтеді.

Экономика және қаржы министрлігінің хабарлауынша, Өзбекстан Республикасы Премьер-министрінің орынбасары – экономика және қаржы министрі Жамшид Қучқоров пен Малайзияның «MIMOS Berhad» ұлттық қолданбалы зерттеу және даму орталығының президенті міндетін атқарушы, бас директоры Саат Шукри Эмбонг арасында онлайн форматта кездесу өтті.

Кездесу барысында тараптар цифрлық даму, ақпараттық технологиялар, инновациялық шешімдер мен бірлескен жобаларды жүзеге асыру перспективалары бойынша пікір алмасты.

Министрлік дерегінше, «MIMOS Berhad» — Малайзияның қолданбалы зерттеулер және даму саласындағы ұлттық орталығы. Ол елдің Ғылым, технология және инновациялар министрлігіне (MOSTI) қарайды.

1985 жылы құрылған бұл мемлекеттік ұйым Малайзияның әлеуметтік-экономикалық дамуына инновациялық технологиялық платформалар, өнімдер және шешімдер арқылы өз үлесін қосып келеді.

Келіссөздер кезінде «MIMOS Berhad» өкілдері Өзбекстанда жүзеге асып жатқан цифрландыру үдерістерін жоғары бағалап, елде заманауи технологияларды енгізу бойынша өз тәжірибесімен бөлісуге дайын екенін білдірді.

Сонымен қатар, екі ел арасында цифрлық экономиканы дамыту, ғылыми-зерттеу қызметін қолдау және IT-экожүйені жетілдіру бағыттарындағы ынтымақтастықты кеңейту мәселелері талқыланды.

Кездесу соңында тараптар өзара серіктестікті одан әрі нығайту және жаңа бірлескен жобаларды жүзеге асыру жөнінде келісімге келді.