Самарқанд қаласында «Узатом» агенттігі мен Италияның «Ansaldo Energia S.p.A.» компаниясы арасында өзара түсіністік туралы меморандумға қол қойылды.

Бұл меморандум аясында кадрлар даярлау, ғылыми-техникалық әлеуетті арттыру және өнеркәсіптік кооперацияны дамыту үшін Италия компаниясының озық технологиялары мен тәжірибесін пайдалану көзделген.

Агенттіктің баспасөз қызметі хабарлағандай, «Ansaldo Energia S.p.A.» — Еуропадағы жетекші энергетикалық компаниялардың бірі. Ол газ және бу турбиналарын, сондай-ақ соларға сәйкес генераторларды жобалау, өндіру, жеткізу, орнату, қызмет көрсету, жөндеу және жаңғырту салаларына маманданған. Компания өз филиалдары арқылы атом энергетикасы бағытында да белсенді жұмыс жүргізеді.

Аталған ынтымақтастық тек экономикалық қана емес, стратегиялық маңызға да ие болады деп күтілуде.

Еске сала кетейік, бұл құжат 28 мамырда Самарқандта Өзбекстан Республикасының Президенті Шавкат Мирзиёев пен Италия Республикасының Премьер-министрі Джорджа Мелони қатысқан жоғары деңгейдегі келіссөздер аясында қабылданған.