Испанияның Кордова қаласында Халықаралық зәйтүн кеңесінің 122-сессиясы өтіп жатыр.

Ауқымды шараға Өзбекстан ауыл шаруашылығы министрі Ибрахим Абдурахмонов жетекшілік еткен делегация қатысып, ауыл шаруашылығы саласындағы бірқатар стратегиялық бастамаларды талқылауда.

Сапар аясындағы келіссөздерде зәйтүн шаруашылығын дамыту, заманауи агротехнологияларды енгізу және су ресурстарын тиімді пайдалану бағыттарындағы ынтымақтастықты нығайту мәселелері күн тәртібіне шығарылды. Делегация мүшелері Испанияның ауыл шаруашылығы, балық шаруашылығы және азық-түлік министрі Луис Планас Пучадеспен кездесіп, ауыл шаруашылығына инновациялық технологияларды енгізу, су тапшылығы жағдайында өнімділікті арттыру және ғылыми-зерттеу байланыстарын күшейту жөнінде нақты ұсыныстарды талқылады.

Кездесу барысында Өзбекстанның бағбандық, көкөніс шаруашылығы, әсіресе шие өсіру саласындағы әлеуеті таныстырылды. Сонымен қатар топырақтың тұздануы, су тапшылығы және климаттық өзгерістерге төзімді өсімдік сорттарына деген сұраныстың артып келе жатқаны ерекше атап өтілді.

Ақпаратқа қарағанда, Испания тарапы тамшылатып суару жүйелері, CRISPR технологиясына негізделген селекция, ауыл шаруашылығын сақтандыру, сондай-ақ білім беру және ғылыми инфрақұрылым салаларында тәжірибе бөлісуге дайын екенін білдірген. Испаниялық кәсіпкерлер де Өзбекстандағы зәйтүн шаруашылығына инвестиция салуға қызығушылық танытып отыр.

Келіссөздер кооперацияларды дамыту, ауыл шаруашылығы өнімдерін қайта өңдеу қуаттарын жаңғырту және экспорт инфрақұрылымын жетілдіру бағытындағы серіктестікті кеңейтуге жол ашты.

Кездесу соңында аграрлық саладағы өзара әріптестікті жаңа деңгейге көтеруге бағытталған өзара түсіністік туралы Меморандумға қол қойылғаны хабарланды. Бұл құжат екі ел арасындағы ұзақмерзімді серіктестікті нығайтып, жаңа инвестициялық және ғылыми жобалардың жүзеге асуына негіз қаламақ.