Ирак астанасы Бағдат қаласында Өзбекстан Республикасы Кеден комитетінің төрағасы А. Мавлонов пен Ирак кеден қызметінің басшысы Самир Қасым Дауд арасында екіжақты кездесу өтті.

Кейінгі жылдары Өзбекстан мен Ирак арасындағы достық қарым-қатынастар мен өзара ынтымақтастықта жаңа кезең басталды. Атап айтқанда, екі ел арасындағы тауар айналымының көлемі соңғы екі жылда 43 пайызға өсті.

Өзбекстан тарапынан негізінен Иракқа азық-түлік, темекі және химия өнеркәсібі өнімдері экспортталса, бұл елден Өзбекстанға көбіне отын-энергетика және мұнай өнімдері импортталып жатыр.

Сауда көлемінің артуы екі мемлекеттің кеден органдары арасындағы ынтымақтастықты одан әрі нығайтуды, ең алдымен, өзара іс-қимылдың құқықтық негіздерін қалыптастыруды талап етеді. Осыған орай кездесуде «Кеден ісінде өзара ынтымақтастық туралы» келісім жобасы жан-жақты талқыланды.

Сондай-ақ жиын барысында Өзбекстанда кеден органдары қызметін цифрландыру және жасанды интеллектті қолдану бағытында қол жеткізілген нәтижелер, Дүниежүзілік кеден ұйымының өңірлік мәртебесіне ие Ұлттық кинология орталығы, сондай-ақ «PICARD» стандарттары бойынша халықаралық аккредитациядан өткен Кеден институты туралы жан-жақты ақпарат берілді.

Тараптар өзара саудада тауарларды кедендік рәсімдеуді одан әрі жеңілдету, кәсіпкерлерді жан-жақты қолдау мәселелері бойынша ынтымақтастыққа дайын екендіктерін білдірді.

Еске сала кетейік, биылғы жылдың 1–7 ақпан күндері аралығында Өзбекстанның 200-ге жуық кәсіпкері Ирак астанасы Бағдат қаласында өтіп жатқан халықаралық «Baghdad International Fair» көрмесіне қатысып жатыр.

Атаулы көрменің «Made in Uzbekistan» ұлттық экспозициясы аясында азық-түлік, тоқыма, жеңіл өнеркәсіп, құрылыс материалдары, электротехника және ауыл шаруашылығы өнімдері ұсынылуда.