Өзбекстан мен Индонезияның авиациялық құрылымдары азаматтық авиация мен зиярат туризмі саласындағы ынтымақтастықты кеңейту жөніндегі жаңа келісімге қол қойды.

Бұл туралы Өзбекстан Көлік министрлігінің баспасөз қызметі хабарлады.

Аталған құжат «Өзбекстан – 2030» стратегиясының 2030 жылға дейін әуе қатынастарын төрт есе арттыруды көздейтін 53-мақсатын жүзеге асыру аясында қабылданды.

Жакартада өткен кездесуде Өзбекстан Көлік министрлігі делегациясы Индонезия тарапына республикада зиярат туризмі мен азаматтық авиацияны реформалау бойынша атқарылып жатқан жұмыстар туралы ақпарат ұсынды. Сонымен қатар, «Ұмра плюс» бағдарламасын дамыту перспективалары талқыланды.

Келіссөздер қорытындысы бойынша бұған дейін бекітілген авиакомпаниялар санына қойылған шектеулер алынып тасталды.

Сонымен қатар, Өзбекстандық әуе тасымалдаушылар үшін Индонезиядағы жаңа бағыттар – Денпасар, Сурабая, Медан, Йогьякарта, Мажаленгка, Банда Ачех, Танжунг Пандан және Ломбок қалаларына рейстер ашу туралы келісімге қол жеткізілді.

Тараптар әр ел үшін аптасына 28 рейске дейін ұшуға мүмкіндік беру жөнінде уағдаласты. Сондай-ақ, Индонезия әуе компанияларына Өзбекстандағы барлық халықаралық әуежайларды пайдалануға рұқсат берілді.