Өзбекстан Республикасы Үкіметі жанындағы Мәдениет және өнерді дамыту қорының төрағасы Гаяне Умерова мен Франция мәдениет министрі Рашида Дати арасында кездесу өтті.

Қордың ақпарат қызметінің хабарлауынша, Парижде өткен кездесуде екі ел арасындағы мәдени алмасуды дамыту, мұраларды сақтау және насихаттауға бағытталған ынтымақтастықты нығайту мәселелері талқыланды. Әңгімелесу барысында Париждегі Араб әлемі институтында өткен «Самарқандқа жол» көрмесі мен Луврдағы Өзбекстанның бай мәдени мұрасын таныстырған көрмелер Франция қоғамында үлкен қызығушылық тудырғаны атап өтілді. 

Сонымен қатар, тараптар мәдени мұраны қорғауда маңызды рөл атқаратын ескерткіштерді қалпына келтіру саласындағы ынтымақтастықты одан әрі жалғастыруға ниетті екенін білдірді. Кездесу барысында Францияның Ұлттық мұра институты (INP) филиалын Ташкентте ашу арқылы реставрация және тәжірибе алмасуды тереңдету мәселесі де қаралды. 

Кездесуде Самарқандта өтетін ЮНЕСКО-ның 43-сессиясында Франция делегациясының қатысуы туралы мәселе де талқыланды. Бұл халықаралық ынтымақтастықты одан әрі дамытуға бағытталған маңызды қадам ретінде бағаланды.