Өзбекстан Республикасы Премьер-Министрінің орынбасары – Экономика және қаржы министрі Жамшид Қучқоров пен Францияның «MEDEF International» ұйымының халықаралық ынтымақтастықтағы жетекші өкілі Клод Имован бастаған кәсіпкерлер делегациясы арасында кездесу өтті.

Кездесуге екі тараптың ірі компанияларының өкілдері, тиісті министрліктер мен мемлекеттік органдар басшылары қатысты. Шарада мемлекеттік-жеке меншік серіктестік, инфрақұрылым жобаларындағы ынтымақтастық байланыстарын кеңейту, «жасыл» өсімді қамтамасыз ету, энергетика, көлік, әуежайларды жаңғырту салаларын дамыту сияқты бірқатар мәселелер талқыланды.

Айта кету керек, «MEDEF International» Францияның ең ірі кәсіпкерлер ұйымы болып табылады. Бұл ұйым мемлекет компанияларының халықаралық нарыққа шығуына көмек көрсетеді. Ұйым шетелдермен экономикалық және сауда байланыстарын дамытуда маңызды рөл атқарады. «MEDEF International» әлемнің 120-дан астам елімен экономикалық ынтымақтастық жүргізеді.

Келіссөздер нәтижесінде тараптар өзара байланыстарды дамыту, ынтымақтастық жобаларын кеңейту және пікір алмасу процесін көбейту жөнінде келісімге келді.