ӨР Олий Мажлис Сенатының Төрағасы Танзила Нарбаева Еуропалық Одақтың Орталық Азия бойынша арнайы өкілі Терхи Хакаламен кездесті.

Сенат баспасөз қызметінің хабарлауынша, кездесу барысында соңғы жылдары тұрақты дамып келе жатқан және ынтымақтастықтың жаңа деңгейіне көтерілген Өзбекстан мен Еуропалық Одақ арасындағы қарым-қатынастарды нығайту мәселелері талқыланды.

Парламентаралық ынтымақтастық, адам құқықтарын қорғау, қауіпсіздікті қамтамасыз ету, қоршаған ортаны қорғау және гендерлік теңдікті ілгерілету мәселелеріне ерекше назар аударылды.

Сонымен қатар, тараптар әйел құқықтары мен мүмкіндіктерін кеңейту мәселелерін, соның ішінде Орталық Азияның жетекші әйелдері диалогының өңірлік платформасы аясындағы бастамаларды талқылады. Халықаралық тәжірибе алмасу және аймақта гендерлік теңдікті ілгерілету үшін маңызды алаң саналатын Азия әйелдері форумының рөлі ерекше атап өтілген.

«Кездесуде Өзбекстанның GSP+ бағдарламасына қатысуы аясында адам және еңбек құқықтарын қорғау, қоршаған орта мен климатты сақтау, тиімді басқаруды қамтамасыз етуге байланысты 27 халықаралық конвенцияны жүзеге асыру міндеттері қаралды. Бұл міндеттемелердің орындалуы Еуропалық Одақпен сауда-экономикалық ынтымақтастықты нығайтуға және Өзбекстанның халықаралық нарықтарға интеграциялануына жаңа мүмкіндіктер ашады», делінген хабарламада. 

Кездесу соңында Өзбекстан мен Еуропалық Одақ арасындағы ынтымақтастықты тереңдетуге бағытталған жоспарды іске асыру бойынша белсенді диалог жүргізу және бірлескен жұмысты жалғастыру туралы келісімге қол жеткізілді.