Нью-Йорк қаласында Өзбекстан мен Белиз арасында дипломатиялық қарым-қатынас орнату туралы бірлескен коммюникеге қол қойылды.

«Dunyo» агенттігінің хабарлауынша, екі ел үкіметтері атынан құжатқа Өзбекстанның БҰҰ жанындағы тұрақты өкілі Улуғбек Лапасов пен Белиздің БҰҰ жанындағы тұрақты өкілі Карлос Фуллер қол қойды.

Тараптар халықаралық ұйымдар, соның ішінде БҰҰ және оның мамандандырылған мекемелері аясындағы ынтымақтастықты нығайтуға мүдделілік танытты. Екіжақты ынтымақтастықтың өзара тиімді бағыттарын анықтау үшін өзара қарым-қатынастарды жандандыру туралы келісімге қол жеткізілді.

Осылайша Орталық Америкада орналасқан Белиз Өзбекстанмен дипломатиялық қарым-қатынас орнатқан 147-ші ел болды.