Өзбекстанда ресми сапармен жүрген БАӘ Үкімет істері министрі Мухаммад бин Абдулла әл-Гаргави ӨР Инвестициялар, индустрия және сауда министрі Ләзиз Қудратовпен кездесті.

Іс-шарада сауда-экономикалық және инвестициялық салалардағы серіктестіктің қазіргі жағдайы мен келешегі сараланып, Өзбекстандағы мемлекеттік басқару тиімділігін арттыру жобалары аясындағы кезекті міндеттер талқыланды.

Айта кету керек, екі ел арасында өткен жылғы көрсеткіштер екі есеге артып, тауар айналымының көлемі артып келеді. Осы өсу қарқынын сақтау мақсатында атқарылған міндеттердің қатарында екі ел арасындағы рейстер саны бірнеше есе артып, аптасына 44-ке жетті. Өзара жеткізілетін тауарлардың түрін одан әрі ұлғайту үшін жүйелі шаралар қабылдау маңызды. Осы орайда тараптар Өзбекстанның экспорттық әлеуетін дамыту стратегиясын дайындау аясында ынтымақтастықты жандандыруға келісті.

Кездесу барысында Өзбекстан өңірлерінің инфрақұрылымын дамыту және өнеркәсіптік әлеуетін арттыру мәселесі де сөз болды. БАӘ тарапы экономикадағы мемлекеттің үлесін қысқартуға бағытталған реформалардың жаңа кезеңін жоғары бағалап, өндірістік қуаттарды арттыру және коммуналдық сектор жүйесін жетілдіру бойынша қалалық және аудандық бас жоспарларды әзірлеуде ынтымақтастықты кеңейтуді ұсынды.

Мемлекеттік басқарудың тиімділігін арттыру және ақпараттық технологияларды кеңінен енгізу мәселесі талқыланып, осыған байланысты тараптар жасанды интеллект саласындағы ынтымақтастықты дамыту жөніндегі кеңес құру қажеттігі туралы келісті.