Өзбекстан Олий Мажлис Сенатына Австрия Федерал кеңесінің төрайымы Андреа Эдер-Гитшталер бастаған делегация ресми сапармен келді.

Сенат Төрайымы Танзила Нарбаевамен өткен кездесуде Австрия парламенті басшылығының Өзбекстанға алғашқы ресми сапары екі ел арасындағы парламенттік ынтымақтастықты дамытуда маңызды кезең болғаны атап өтілді.

Келіссөздер барысында парламентаралық байланыстарды кеңейту, әлеуметтік қорғау саласында тәжірибе алмасу, туризмді дамыту, өңіраралық әріптестікті нығайту, сондай-ақ тұрақты даму, әйелдер құқықтарын қорғау және жастар саясаты сияқты кең ауқымды мәселелер талқыланды.

Танзила Нарбаева атап өткендей, ел басшысының нақты саяси ерік-жігерінің арқасында Өзбекстанда парламент өкілеттіктері дәйекті түрде кеңейіп, әйелдердің саясаттағы белсенділігі жаңа деңгейге көтерілуде.

Кездесу барысында тараптар парламенттер арасындағы ынтымақтастықты, соның ішінде халықаралық парламенттік ұйымдар аясында да жандандыруға өзара мүдделі екенін білдіріп, бірқатар нақты бастамалар көтерілді.

Олардың қатарында парламенттер мен тиісті комитеттер басшыларының тұрақты кездесулерін өткізу, парламентаралық достық топтарының бірлескен іс-қимыл жоспарын әзірлеу және өңіраралық байланыстарды кеңейту мәселелері бар.