ӨР Денсаулық сақтау министрі Амрилло Иноятов АҚШ-тың Ауруларды бақылау және алдын алу орталықтарының Орталық Азия аймақтық бағдарламасы директорының міндетін атқарушы Джастин Уильямспен кездесті.

ДСМ дерегінше, кездесуде елдер арасындағы медицина саласындағы ынтымақтастық жылдан жылға нығайып келе жатқаны, бірлескен жобалар Өзбекстанда осы саланы дамытуға қызмет етіп жатқаны айтылды.

Мемлекет басшысының тапсырмасы негізінде коронавирус және басқа да жұқпалы инфекциялармен күрес, вакцинация, санитарлық-эпидемиологиялық және басқа да салаларда тиісті жобалардың нәтижелі жүзеге асырылып жатқаны атап өтілген.

«2023 жылы өзара ынтымақтастық аясында медициналық қызметкерлердің эпидемиологиялық зерттеулерді жүргізу, ғылыми деректерді талдау және қауіпті жұқпалы ауруларға қарсы қажетті шараларды қабылдау бойынша білімдері мен дағдыларын Қолданбалы эпидемиологиялық оқыту бағдарламасы (FEPT) арқылы арттыру жоспарлануда.

Өзбекстанда COVID-19-ға қарсы тиімді күрес аясында вакцинация бағдарламасын күшейту, коронавирус және басқа да жұқпалы инфекциялардың таралуын азайту, респираторлық ауруларды бақылау жүйесін қолдау сияқты маңызды жобаларды іске қосу көзделген», делінген хабарламада.

Кездесуде сондай-ақ өзара ынтымақтастықты жаңа деңгейге көтеру, оның ішінде Өзбекстандағы В және С вирустық гепатитін жою жөніндегі Ұлттық іс-шаралар жоспарын әзірлеуге техникалық көмек көрсету, COVID-19-дың штаммдарын анықтау және микробқа қарсы тұрақтылық жобасын іске қосу бойынша қарым-қатынастарды кеңейту туралы шешім қабылданды.