Өзбекстан әлемдік автокөлік өнеркәсібіндегі ірі компанияларға дайын өнім жеткізетін болады.

«Узчармсаноат» қауымдастығы делегациясының Оңтүстік Кореяға сапары барысында осы елдің автомобиль жасау кәсіпорындары үшін тері өнімдерін жеткізуші «JM» компаниясымен кездесу өтті.

Кездесу барысында корейлік компанияға Өзбекстанда өндірілетін былғары өнімдерінің сапасы, шикізат базасы, кәсіпорындарда қолданылып жатқан заманауи технологиялар, инвестициялық орта туралы толық ақпарат берілген.

«JM» компаниясы Оңтүстік Кореядағы ең ірі былғары өндіруші компания болып табылады. Мұнда жасалған былғары бұйымдары негізінен «Hyundai», «Kia», «Toyota» көліктеріне жеткізіледі. Компанияның жылдық табысы 250 миллион долларды құрайды. 1 миллиард долларға құрылған өндіріс орны толығымен итальяндық және неміс технологияларымен жабдықталған.

Сұхбат барысында компания Өзбекстандағы былғары өнеркәсібі саласындағы соңғы жылдардағы өзгерістер мен жаңартулардан хабардар екенін, сондықтан Өзбекстаннан дайын былғары сатып алуды жоспарлап отырғанын мәлімдеді.

Сондай-ақ, «Узчармсаноат» бірлестігінің делегациясы өндіріс үдерістері мен өнім сапасымен танысты. Бұл ретте «JM» компаниясының өкілдеріне Өзбекстанның 16 облысында құрылған шағын индустриялық аймақтар мен тері өнеркәсібіне бағытталған жобаларды жүзеге асыру бойынша іскерлік ұсыныстар көрсетілді.

Компания Ташкент облысында бірлескен кәсіпорын ашу және онда өндірілетін былғарыны Оңтүстік Корея нарығына және автомобиль жасау саласындағы ірі компанияларға жеткізу туралы бастамаларын жеткізді.

Компания делегациясы сәуір айында Ташкентке келіп, жергілікті былғары өндіретін кәсіпорындармен келіссөздер жүргізуі және жүзеге асырылатын жобаларды талқылауға дайын екенін мәлімдеген.

«Узчармсаноат» бірлестігінің баспасөз қызметі Өзбекстанда өндірілген былғары бұйымдары Оңтүстік Кореяның ірі автомобиль зауыттарында шығарылатын көліктерде қолданылатынын хабарлаған.