Өзбекстан Конституциясына өзгерістер мен толықтырулар енгізу туралы заң жобасына ұсыныстарды қабылдау 1 тамыз күні сағат 00:00-де тоқтатылды.

Конституциялық заң жобасы 2022 жыл 25 шілдеде қоғамдық талқылауға шығарылып, талқылауға бастапқыда 10 күн берілген болатын. Депутаттар бұл мерзімді жеткіліксіз деп тауып, тағы 10 күнге созды. Кейін заң жобасын талқылауды 1 тамызға дейін ұзарту туралы шешім қабылданды.

Конституциялық комиссия баспасөз қызметінің хабарлауынша, 30 шілдеде азаматтардан 117 мыңнан астам ұсыныс түскен.

Келіп түскен ұсыныстардың қорытындысы бойынша, ең көп ұсыныстар жобаның 1, 13, 41, 90, 93, 99, 100, 101 және 102-баптары бойынша түскен. Олардың салалар бойынша талдауы көрсеткендей, ең көп ұсыныс әкімшілік-аумақтық мәселелер (38 456), мемлекеттік басқару (28 297), адам құқықтары (2 125), білім беру (1 862) және жергілікті өзін-өзі басқару (910) саласына тиісті баптарға қатысты.

Мемлекеттік және мемлекеттік емес радиоарналарда 2500-ден астам танымдық және арнайы хабар таратылып, орталық және облыстық басылымдарда 950 мақала жарияланды. Конституциялық комиссия мүшелері мен сарапшылардың бұқаралық ақпарат құралдарында тұрақты түрде шығуы ұйымдастырылды.

«Заң шығару палатасының жауапты комитеттері халықтан түскен ұсыныстарды қорытындылау, талдау және заң жобасын жетілдіру жұмыстарын жалғастырады», - делінген комиссияның хабарламасында.