Франция Мәдениет министрлігінде Өзбекстан Мәдениет және өнерді дамыту қорының төрайымы Гаянэ Умероваға «Өнер және әдебиет ордені» (Ordre des Arts et des Lettres) кавалері белгісін табыстау салтанаты өтті.

Францияның мәдениет министрі Рашида Дати Өзбекстанда мәдениет саласында жүргізіліп жатқан реформаларды жоғары бағалап, бұл қадамдардың екі ел арасындағы стратегиялық серіктестікті нығайтуға елеулі үлес қосып жатқанын атап өтті.

— Бұл жоғары марапат — Өзбекстанның халықаралық мәдени байланыстарды кеңейту, өнер саласындағы жаһандық диалогты дамыту жолындағы күш-жігері мен үлесінің мойындалуы, — деді министр Рашида Дати. — Үкімет, Президент әкімшілігі, Францияның Сыртқы істер министрлігі, дипломатиялық корпус, мәдениет қайраткерлері мен халықаралық серіктестер қатысқан бұл шара Өзбекстанның мәдени дипломатиясының табысты жүріп жатқанын дәлелдейді.

Соңғы жылдары Өзбекстан мен Франция арасындағы мәдени және өнер салаларындағы ынтымақтастық жаңа деңгейге көтерілді. Бұған Лувр музейінде ұйымдастырылған өзбек мұрасына арналған кең көлемді көрме, халықаралық мәдени форумдарға белсенді қатысу секілді маңызды бастамалар себеп болды.

Мемлекет басшысының бастамаларын жүзеге асыруда басым жобаларды ілгерілетіп отырған Өзбекстан Мәдениет және өнерді дамыту қоры ерекше рөл атқарып отыр.

Айта кетейік, «Өнер және әдебиет» ордені Францияда және бүкіл әлемде өнер мен әдебиетті дамытуға елеулі үлес қосқан тұлғаларға жыл сайын шамамен 60 адамға табысталады.