Өзбекстан Республикасы Президентінің мемлекеттік басқару тиімділігін арттыруға бағытталған Жарлығын іске асыру аясында еліміздің Жұмыс тобы Италияға сапар жасап, мемлекеттік басқару мен өңірлерді дамыту салаларында бірқатар маңызды келісімдерге қол жеткізді.
Италияның Өңірлік істер және автономиялар министрлігімен, сондай-ақ Лацио өңірі басшылығымен өткен мазмұнды келіссөздер нәтижесінде екі ел арасындағы ынтымақтастықты өңірлер деңгейінде тереңдетуге бағытталған басты бағыттар айқындалды.
Атап айтқанда, Италияның жергілікті бюджеттердің тұрақтылығын қамтамасыз ету жөніндегі озық тәжірибесін Ташкент, Сұрхандария, Наманган және Бұхара облыстарында кезең-кезеңімен енгізу көзделіп отыр. Сонымен қатар, Өзбекстан облыстары мен Италия өңірлері арасында тікелей инвестициялық байланыстарды жолға қою жөнінде уағдаластыққа қол жеткізілді.
Осы келісімдер аясында Лацио өңірімен Ташкент облысында фармацевтика мен логистика салаларында, Тоскана өңірімен Бұхара облысында туризм бағыты бойынша, Эмилия-Романья өңірімен Наманган облысында тоқыма өндірісі мен омарта шаруашылығын дамыту, ал Абруццо өңірімен Сұрхандария облысында жүзім шаруашылығы саласында бірлескен жобаларды іске асыру жоспарланып отыр.
Білім беру және инновация бағытындағы әріптестік те кеңейе түспек. Атап айтқанда, Римдегі беделді La Sapienza университетінің Ташкент қаласында филиалын ашу, Паркент ауданында энотуризм кешенін салу, сондай-ақ Lazio Innova агенттігі мен Өзбекстан Республикасы Президенті жанындағы Басқару тиімділігі агенттігі арасында инновацияларды қолдау жөніндегі бірлескен жұмыс тобын құру туралы келісімдер жасалды. Қол жеткізілген уағдаластықтар аясында 2026 жылдың наурыз айына дейін нақты инвестициялық жобалар пысықталып, «Ташкент – Лацио өңірлері» бизнес-форумын өткізу жоспарланып отыр.
Бұл бастамалар мемлекеттік басқару жүйесінің тиімділігін арттырып қана қоймай, өңірлер экономикасына озық шетелдік тәжірибені жүйелі түрде енгізуге және Өзбекстан мен Италия арасындағы стратегиялық серіктестікті жаңа сапалық деңгейге көтеруге қызмет етпек.