Тегеран қаласында өткен Өзбекстан – Иран бизнес-форумының ашылу салтанатында Өзбекстан Республикасының Премьер-Министрі Абдулла Арипов пен Иран Ислам Республикасының Бірінші вице-президенті Мұхаммед Риза Ориф сөз сөйледі.

Форум барысында мұндай кездесулер екі ел арасындағы сауда-экономикалық байланыстарды тереңдетіп, өзара ынтымақтастықтың жаңа қырларын ашуға қызмет ететіні ерекше атап өтілді.

Пікір алмасу кезінде екіжақты сауда көлемінің тұрақты өсімі атап өтілді — тауар айналымы 500 миллион долларға жетіп, бірлескен кәсіпорындар саны 210-нан асты. Тараптар бар әлеуетті жан-жақты саралап, жалпы құны 1 миллиард долларды құрайтын жаңа жобалар мен сауда келісімдерін пысықтады.

Өз сөзінде Үкімет басшысы қатысушылар назарын Президент Шавкат Мирзиёевтің басшылығымен елде бизнес ортаны жақсарту және шетелдік инвесторларға қолайлы жағдай жасау бағытында жүргізіліп жатқан кең ауқымды реформаларға аударды.

Атап айтқанда, соңғы жылдары ЖІӨ екі есеге өскені, Халықаралық валюта қорының дерегіне сәйкес, Өзбекстанның ЖІӨ алғаш рет 100 миллиард доллардан асқаны айтылды. Алдағы бес жылда бұл көрсеткішті 160 миллиард долларға жеткізу көзделіп отыр. 2025 жылдың бірінші тоқсанында елдің экономикалық өсімі 6,8 пайызды құрады.

Кейінгі жылдары Өзбекстанға 70 миллиард доллардан астам шетелдік инвестиция тартылған. Халықаралық қаржы институттарының 14 миллиард доллардан астам қаржысы әлеуметтік және инфрақұрылымдық салаларға бағытталды. 2030 жылға қарай «жасыл» энергияның энергетикадағы үлесін 50 пайыздан асыру межеленген.

Өзбекстан минералды ресурстар мен сирек кездесетін пайдалы қазбаларға бай. Бизнесті қолдау үшін маңызды шешімдер қабылданып, 200-ден астам лицензия мен рұқсатнама беру тәртібі жойылды. Салық түрлері 13-тен 9-ға қысқартылып, кейбірі екі есе төмендетілді.

Валюта нарығы ырықтандырылып, кірістерді елден әкетуге қойылған барлық шектеулер алынып тасталды. ҚҚС мөлшері 15 пайыздан 12 пайызға, ал пайда салығы қызмет түріне қарай 5–15 пайыз аралығында белгіленді.

Ал ауыл шаруашылығы мен әлеуметтік салада жұмыс істейтін кәсіпорындар пайда салығынан толық босатылған.

Республикада жылына 25 миллион тонна жоғары сапалы көкөніс пен жеміс-жидек өндіріліп, 2,5 миллиард доллардың өнімі шет елдерге экспортталып жатыр.

Форумда Өзбекстанның көптеген елдермен жеңілдікті сауда режиміне ие екені атап өтіліп, ирандық кәсіпкерлерді Хорезм мен Самарқанд облыстарындағы индустриялық аймақтардың мүмкіндіктерін кеңінен пайдалануға шақырды.

Бизнес-форумға Өзбекстаннан 100-ден астам кәсіпкер мен министрлік, ведомство өкілдері қатысып, өз салалары бойынша B2B форматында келіссөздер жүргізді.

ӨзА