Өзбекстан Республикасының Экология және климаттың өзгеруі жөніндегі ұлттық комитеті өкілдері Баку қаласында өткен энергия үнемдейтін салқындату жүйелеріне қатысты жаңа аймақтық жобаны бекіту отырысына қатысты.
Өзбекстан, Әзербайжан, Қазақстан және Украина делегациялары қатысқан іс-шарада, Global Environment Facility қолдау көрсететін және БҰҰ-ның Өндірісті дамыту ұйымы (UNIDO) жүзеге асыратын бастаманы үйлестіру бойынша келісімге қол жеткізілді.
Жоба өнеркәсіп, ауыл шаруашылығы және азық-түлік жүйелері мен халыққа сенімді қызмет көрсетуді қамтамасыз ете отырып, климатқа бейім заманауи салқындату технологияларына көшуді жеделдетуге бағытталған.
Жаһандық жылыну жағдайында және ауыл шаруашылығы, денсаулық сақтау, өндіріс пен сауда салаларында салқындату жабдықтарына сұраныс артып келе жатқан кезеңде бұл саланы жаңғырту стратегиялық маңызға ие.
Кездесуде жаһандық жылыну әлеуеті жоғары парниктік газдар — гидрофторкөміртектерді кезең-кезеңімен қысқарту мәселесіне ерекше назар аударылды.
Бұл үдеріс экологиялық таза баламалы технологияларға көшуді ынталандырып, Орталық Азия мен Шығыс Еуропа елдері үшін жаңа технологиялық мүмкіндіктер ашады. Сонымен қатар, бұл өзгерістер ауқымды инвестицияларды, жетілдірілген нормативтік-құқықтық базаны және білікті мамандар даярлауды талап етеді.
Жоба қатысушы мемлекеттерге ұлттық салқындату және кондиционер жабдықтары секторларының қажеттіліктерін талдау, энергия үнемдейтін заманауи технологияларды таныстыру, тоңазытқыштарды құрастыру, қайта өңдеу және қауіпсіз жою жүйелерін жетілдіру, сондай-ақ институционалдық және кадрлық әлеуетті дамыту бағыттарында практикалық қолдау көрсетеді.
Сондай-ақ оқу бағдарламаларын дамытуға, білім алмасуға және өңірлік ынтымақтастық желілерін кеңейтуге ерекше көңіл бөлінеді.
Кездесу соңында тараптар жоба құжаты бойынша келісімге келіп, техникалық мәселелерді нақтылау және бірлесіп қаржыландыруды растау секілді келесі кезеңдерді белгіледі. Бастама Самарқанд қаласында өтетін Global Environment Facility Ассамблеясында таныстырылмақ. Бұл аймақта энергия үнемдейтін салқындату жүйелерін дамытуға бағытталған бастамаларға халықаралық назарды одан әрі күшейтеді.