Өзбекстан Республикасының экономикасы 2025 жылдың бірінші жартысында 7,2 пайызға өсті.

Бұл туралы Орталық банк жариялаған 2025 жылдың I жартыжылдығына арналған Қаржылық тұрақтылық шолуында мәлімделді.

Құжатта көрсетілгендей, 2025 жылдың алғашқы жартысында Өзбекстан экономикасы тұрақты өсім көрсетуді жалғастырды. ЖІӨ-нің жылдық нақты өсімі 7,2 пайызды құрады. Бұл өсімге ішкі сұраныс 6,5 пайыз, ал таза экспорттағы теріс сальдоның қысқаруы 0,8 пайыз үлес қосты. Атап айтқанда, ішкі сұраныс құрылымындағы түпкілікті тұтыну шығындары жылдық есеппен 8,7 пайызға артқан.

Өзбекстанның негізгі сауда серіктестері Оңтүстік Корея, Ресей, Түркия, Қытай және Қазақстанмен салыстырғанда елде жоғары экономикалық өсім қарқынының сақталуы күтіліп отыр. Халықаралық валюта қоры мен Дүниежүзілік банк болжамдарына сәйкес, 2025 және 2026 жылдары Өзбекстанның нақты ЖІӨ өсімі 6–6,8 пайыз шамасында болады. Ал сауда серіктестері бойынша орташа өсім қарқыны тиісінше 4 пайыз және 3,6 пайызды құрайды.

2025 жылдың I жартыжылдығында ағымдағы операциялар шотының теріс сальдосы 156,3 млн АҚШ долларына қысқарды. Сонымен бірге, экспорт өсімі импорттан 19 пайызға жоғары болды. Соның нәтижесінде сауда балансының теріс сальдосы 20 пайызға азайып, 6,4 млрд АҚШ долларына теңесті.

Банк жүйесінің нерезиденттер алдындағы міндеттемелері ЖІӨ-ге шаққанда 14 пайыз деңгейінде қалып, 2024 жылдың сәйкес кезеңімен салыстырғанда айтарлықтай өзгеріссіз қалды. Бұл көрсеткіштер экономикалық тұрақтылық пен қаржы жүйесінің тәуекелдерге төзімділігін айғақтайды.

GaR моделінің нәтижесіне сәйкес, 2025 жылдың I жартыжылдығында тәуекел ахуалында алдағы бір жылда нақты ЖІӨ өсімі 5 пайыз ықтималдықпен 6 пайыз деңгейінде болуы мүмкін. Бұл қаржылық жағдайдың жақсарғанын және тәуекел ауқымының азайғанын білдіреді.