Соңғы 4 жылда Өзбекстан халықаралық рейтингте 44 сатыға көтеріліп, ең кейінгі есеппен салыстырғанда 6 сатыға жоғарылаған.

Heritage Foundation ғылыми-зерттеу орталығы Wall Street Journal-мен бірлесіп, Экономикалық еркіндік индексі 2021 есебін жариялады. Онда Өзбекстан 186 елдің ішінде 58,3 ұпаймен 108-орында тұр. Ең кейінгі есеп бойынша, елдің рейтингі 1,1 балға жақсарып, 6 сатыға көтерілген болса, соңғы төрт жылда 44 сатыға жоғарылаған (152-орыннан 108-орынға).

Экономикалық еркіндік индексінде Өзбекстандағы 12 индикатордың 7-сінде оң өзгерістерді тіркеп, 3 индикатор төмендеп, 2 бойынша өзгеріс байқалмаған.

Қорытынды 2019 жылдың 1 шілдесінен 2020 жылдың 1 шілдесіне дейінгі аралықтағы мәліметтер базасына негізделген. Осыған орай Өзбекстан Азия-Тынық мұхиты аймағындағы 40 елдің ішінде 21-ші орынға ие екендігі айтылады.

Осы әлемдік рейтингтің алғашқы үштігінде Сингапур (89,7 ұпай), Жаңа Зеландия (83,9 ұпай) және Австралия (82,4 ұпай) елдері жайғасқан болса, ең төменгі орындарда Куба (28,1 ұпай), Венесуэла (24,7 ұпай) және Солтүстік Корея (5,2 ұпай) елдері тұр.