Испанияның Барселона қаласында өтіп жатқан әлемдегі ең ірі технологиялық алаңдардың бірі – Mobile World Congress (MWC) аясында Өзбекстанның Цифрлық технологиялар министрі Шерзод Шерматов GSMA басшылығы және бірқатар жетекші IT-компаниялардың өкілдерімен мазмұнды кездесулер өткізді.

Министрлік мәліметінше, Шерзод Шерматов конгрестің салтанатты ашылу рәсіміне қатысып, бірқатар стратегиялық сессияларда сөз сөйледі. Ол қазіргі технологиялық дәуірде жасанды интеллектіні қарқынды дамыту үшін халықаралық ынтымақтастықты кеңейту айрықша маңызды екенін атап өтті. Сондай-ақ Өзбекстанда 2025 жылы қабылданған шешімдерге сәйкес жасанды интеллект елдің ұлттық басым бағыттарының бірі ретінде белгіленгені айтылды.

Конгресс барысында цифрлық инфрақұрылымды дамытуға қатысты маңызды мәселелер кеңінен талқыланды. Атап айтқанда, интернет қамту ауқымын кеңейту, спутниктік байланыс қызметтерін дамыту, киберқауіпсіздік жүйесін күшейту және деректер инфрақұрылымын жетілдіру бағыттары сараланды. Сонымен қатар Өзбекстанда заманауи деректер орталықтарын құруға арналған қолайлы инвестициялық орта таныстырылып, халықаралық инвесторлар бірлескен жобаларға шақырылды.

Халықаралық форум аясында алғаш рет IT Park Uzbekistan ұлттық стенді ұйымдастырылып, елдің технологиялық әлеуеті мен инновациялық бастамалары таныстырылды. Бұл алаң шетелдік компаниялармен жаңа серіктестік байланыстар орнатуға мүмкіндік берді.

Сонымен бірге форум қатысушылары 20–21 мамыр күндері Самарқанд қаласында өтетін «GSMA M360 Eurasia» халықаралық конгресіне шақырылды. Бұл шара аймақтағы цифрлық трансформация мен телекоммуникация саласының болашағын талқылайтын маңызды диалог алаңына айналмақ.  Сонымен қатар конгресс алаңында өткен пікірталастар мен кездесулер жаңа технологиялық серіктестіктердің қалыптасуына жол ашып, цифрлық экономиканың болашақ бағыттарын айқындауға мүмкіндік берді.