Өзбекстанда энергетика саласы экономикалық тұрақтылықтың және аймақтық ынтымақтастықтың маңызды бағыты ретінде дамып келеді.

Қазіргі күнде республикада жүргізіліп жатқан реформалар, сондай-ақ көршілес мемлекеттермен өзара тиімді серіктестікті нығайтуға бағытталған шаралар өңірлік энергетикалық қауіпсіздікті қамтамасыз етуге қызмет етуде. Ауғанстанмен ынтымақтастық бұл үдерісте айрықша стратегиялық мәнге ие болып, екі ел арасындағы экономикалық байланыстарды одан әрі күшейтіп отыр.

Осы бағыттағы жұмыстар аясын кеңейту мақсатында Ташкентте Энергетика министрі Журабек Мирзамахмудов және Ауғанстанның DABS компаниясы бас директоры Абдул Бори Умар бастаған делегация арасында кездесу өтті. Оған Өзбекстан энергетика компанияларының басшылары мен жауапты өкілдері қатысты.

Мұнда биыл қыркүйек айында Өзбекстан Республикасының Президенті Шавкат Мирзиёевтің БҰҰ Бас Ассамблеясының 80-сессиясындағы, сондай-ақ Ташкентте өткен Орталық Азия мемлекеттері басшыларының жетінші Консультативтік кездесуіндегі сөздерінде көтерілген бастамалар талқыланды. Әсіресе Ауған халқының тұрмысын жақсарту мен экономикасын қолдауға бағытталған идеялар екі ел ынтымақтастығын жаңа деңгейге көтеріп отырғаны атап өтілді.

Келіссөздер барысында Ауғанстан аумағында салынып жатқан жоғары кернеулі электр жеткізу желілері мен қосалқы станциялар құрылысына қатысты жұмыс барысы қаралды. Жобалардың қазіргі жағдайы, техникалық шешімдері, іске асыру мерзімдері және қарқынды жалғастыру жөніндегі ұсыныстар жан-жақты зерделенді. Бұл бағыттағы практикалық қадамдардың екі ел үшін стратегиялық маңызы зор екені айтылды.

Кездесу қорытындысында 2026 жылы электр энергиясын жеткізу туралы тиісті келісімшартқа қол қойылды. Аталған құжат энергетика саласындағы өзара серіктестікті одан әрі нығайтып, екі мемлекет арасындағы ынтымақтастықтың нақты жүзеге аса бастағанын білдіреді. Сонымен бірге жобалардың тұрақты дамуына және алдағы жылдары энергетикалық әріптестік ауқымын кеңейтуге берік негіз қалайды.