Өзбекстан Кеден комитетінің төрағасы Акмалхожа Мавлонов Вашингтонда АҚШ Кеден және шекара қызметінің комиссары Трой Миллермен екіжақты кездесу өткізді.

Комитет баспасөз қызметінің хабарлауынша, кездесу барысында Өзбекстан мен АҚШ кеден қызметі басшылары «Ынтымақтастық және өзара көмек туралы» келісімге қол қойды. 

Бұл құжат кеден саласындағы ынтымақтастықтың маңызды құқықтық негізі саналады.

«Екіжақты қарым-қатынастарда жаңа кезең ашатын бұл құжат Өзбекстан мен АҚШ арасында кеден саласында ақпарат алмасуға мүмкіндік береді және есірткі саудасы, адам саудасы, трансұлттық қылмыстық топтар, қылмыстық табысты заңдастыру, кедендік төлемдерден жалтаруға қарсы күресте ынтымақтастықты нығайтуға қызмет етеді», – делінген хабарламада.

Айта кетсек, АҚШ кедендік ынтымақтастық туралы осындай екіжақты келісімдерді әлем бойынша тек 17 елмен ғана жасаған болса, Өзбекстан бұл тізімде 18-ші мемлекет ретінде тіркеліп отыр.

Келіссөздер барысында АҚШ Кеден және шекара қызметінің мамандарын Өзбекстанға шақыру және өзбекстандық мамандардың АҚШ-та біліктілігін арттыру мүмкіндіктері талқыланған.