2022 жыл 30 маусымда Өзбекстан Республикасы мен Алжир Халық Демократиялық Республикасы арасында дипломатиялық байланыс орнағанына 30 жыл толды.

Өзбекстан СІМ мәліметінше, тарихи жағдайға орай екі елдің сыртқы істер министрліктерінің басшылары Владимир Норов пен Рамтан Ламамра бір-бірін құттықтады.

Атап айтқанда, ӨР Сыртқы істер министрі міндетін атқарушы В.Норов әріптесін маңызды датамен құттықтай отырып, Өзбекстан-Алжир қарым-қатынастары соңғы жылдары жаңа мағына мен мәнге ие болып, биік белестерге көтеріліп келе жатқанын атап өтті. Бірлескен күш-жігер арқылы мемлекетаралық ынтымақтастықтың сапасын жаңа деңгейге көтеруге болатынына сенім білдірілді.

Өз кезегінде Алжир сыртқы саяси мекемесінің басшысы Р.Ламамра екі ел арасындағы қарым-қатынастар өзара сенім, құрмет және тең құқықтылық қағидаттарына негізделгенін қуанышпен атап өтті.

Алжир тарапының Өзбекстанмен саясат, экономика және қауіпсіздік салаларындағы ынтымақтастықты жеделдету үшін пәрменді шаралар қабылдауға дайын екені жарияланғаны айтылады СІМ хабарында.