Өзбекстан Республикасы тарихта алғаш рет Біріккен Ұлттар Ұйымының Статистика комиссиясының толық мүшесі болып сайланды.

Өзбекстан Сыртқы істер министрлігінің мәліметінше, Нью-Йорк қаласында БҰҰ Статистика комиссиясының 2026–2029 жылдарға арналған мүше мемлекеттері сайланды. Өзбекстан тарихта алғаш рет осы органның мүшесі болып бір ауыздан сайланды.

Комиссияның толыққанды мүшесі болу елге жаһандық статистикалық саясатқа қатысуға, ұлттық тәжірибе мен реформалар жетістігін көрсетуге, озық шетелдік тәжірибелерді үйренуге және халықаралық ынтымақтастықты нығайтуға кең мүмкіндік ашады.

Статистика комиссиясы 1947 жылы БҰҰ Экономикалық және әлеуметтік кеңесі жанындағы функционалдық орган ретінде құрылған.

Комиссия — халықаралық статистика саласының дамуын айқындайтын негізгі үкіметаралық ұйым. Ол әмбебап статистикалық стандарттар мен әдістемелік қағидалар бойынша жұмысты үйлестіреді. Комиссия құрамында 24 мемлекет бар және олар әр 4 жыл сайын географиялық тепе-теңдік негізінде сайланады.