Ўзбекистон Республикасининг Бенилюкс мамлакатларидаги элчихонаси мазкур кино тасмаси экранларга чиқарилишини маълум қилди.

“Тез орада мамлакат экранлари орқали машъум уруш ҳақидаги яна бир фильм — тарихнинг навбатдаги қонли саҳифаси, эзгулик ва ёвузлик ўртасидаги азалий кураш, бир зумда илоҳий саодат манзилига йўл олган оддий ўзбек аскарларининг қаҳрамонлиги ва фожиаси мужассамлашган санъат асари томошабинлар ҳукмига ҳавола этилади, — дейилган элчихонанинг ижтимоий тармоқдаги саҳифасида эълон қилинган мақолада. — Гитлернинг айёрона режасини пучга чиқарган қаҳрамонлар тақдирини чуқурроқ англаб етишда ноёб кинокадрлар, актёрлар ижроси ва Ҳамидулла Ҳасановнинг режиссерлик маҳорати катта ёрдам беради“.

Ушбу фильм Анвар Эргашев ва Юлия Медведовская биргаликда ёзган шу номдаги роман асосида тасвирга олинган. Шунингдек, кино асарига режиссёрнинг шахсий изланишлари ва мулоҳазалари, қолаверса, нидерландиялик журналист ва тадқиқотчи Ремко Рейдинг ҳамда Ўзбекистоннинг Бенилюкс мамлакатларидаги элчихонаси ёрдамида қўлга киритилган қимматли маълумотлар ҳам асос бўлди, деб ёзади МДҲ Ижроия қўмитаси сайти.

Таъкидлаш жоиз, 101 нафар ўзбек жангчиси хотирасини абадийлаштириш лойиҳаси амалга оширилишида мамлакатимиз Президенти Шавкат Мирзиёевнинг ташаббуси ҳал қилувчи аҳамиятга эга бўлди. Бу йўналишдаги чора-тадбирлар айнан Давлатимиз раҳбарининг тегишли қарорида белгилаб берилган.

Амерсфортдаги ўзбек аскарларининг отиб ўлдирилганига бугун 75 йил бўлди.

Улар Смоленск шаҳри яқинида асир олингач, ўша концлагерга олиб кетилган. Учинчи рейхнинг бош тарғиботчиси Йозеф Геббельс топшириғи билан бу жангчиларни нацистлар “ёввойи халқлар“ билан қандай урушаётгани тўғрисидаги фильмни суратга олишда фойдаланиш учун тайёрлашган. Бундан ташқари Адольф Гитлернинг Совет Иттифоқини яшин тезлигида эгаллаш режаси барбод бўлганлиги сабабли, кино тасмаси руҳан чўккан немис аскарларини дадиллантириб, рақибни кучсиз кўрсатиш учун ҳам зарур эди.

Нацистлар 101 тутқунни ажратиб олишган ва уларга умуман егулик беришмаган. Немис тасвирчилари гуруҳини чақиришгач, очликдан силласи қуриган ҳарбий асирлар олдига бир буханка нонни отиб юборишган. Ваҳшийлар наздида барча асирлар шу бир бўлак нонга ташланишлари лозим эди, лекин бундай бўлиб чиқмади. Воқеа мутлақо бошқача тус олди.

Ўзбеклар шарқона анъанага кўра, нонни майда бўлакларга бўлиб, бир-бирларига улаша бошладилар. Ниятларига ета олмаган немислар эса бундан жаҳл отига миниб, тутқунларни аёвсиз калтаклай бошлайдилар. Шундан кейин, разиллар аскарларимизни отиб ташлашган.