Ўзбекистонлик ёш олимлар Германияда малака оширади
Ўзбекистон Республикаси Инновацон ривожланиш вазирлиги ва Германиянинг таълим ва тадқиқотлар бўйича федератив вазирлиги ҳамкорлигида 13 нафар ёш олим Берлинга стажировкага жўнатилди.
Ўзбекистон Республикаси Инновацон ривожланиш вазирлиги ва Германиянинг таълим ва тадқиқотлар бўйича федератив вазирлиги ҳамкорлигида 13 нафар ёш олим Берлинга стажировкага жўнатилди.
7 октябрь куни ёш олимлар Берлинда Ўзбекистоннинг Германия Федератив Республикасидаги элчиси Набижон Қосимов билан учрашди. Суҳбат чоғида Ўзбекистон – Германия техник университетини ташкил этиш режалаштирилаётгани, унда немис таълим тизими жорий этилиши ҳақида маълумот берилди. Ҳозир университет стратегияси ишлаб чиқилаётган бўлиб, мазкур олий таълим муассасасида нафақат ўзбекистонлик, балки қўшни давлатлар ёшларининг ҳам билим олиши учун шароит яратилади.
Германияда кўплаб ўзбекистонлик ёшлар таълим олади. Ўтган йили ноябрь ойида элчихона томонидан ўтказилган “Инновацион ғоялар” тадбирида Германияда ўқийдиган талабаларнинг 19 та лойиҳаси тақдимоти ўтказилди. Мазкур лойиҳаларнинг бари Ўзбекистон билан Германия ўртасидаги иқтисодий, ижтимоий муносабатларни мустаҳкамлашга қаратилган.
Элчихона ходимлари бугунги кунда икки давлат университетлари ва тиббиёт муассасалари ўртасида ҳамкорлик ўрнатиш бўйича иш олиб бормоқда.
Учрашув сўнггида ўзбекистонлик ёш олимлар элчихона биноси ва бу ерда яратилган шароитлар билан танишди.
Ўзбекистоннинг Берлиндаги элчихонаси 2001 йил апрель ойида очилган. У 1879-1880 йилларда қурилган тарихий бинода жойлашган. Элчихона ҳудудида 1870-1871 йилларга доир Пруссия бургути ҳайкали ўрнатилган устун ҳам бор. Бино Германия ёдгорликларни ҳимоя қилиш жамияти томонидан қўриқланади.
Элчихона ҳовлисида ўзбекистонлик усталар томонидан миллий айвон қурилган. Уни кўрган инсон борки, ўзини Ўзбекистондагидек ҳис қилади.
