«Ўзбеккино» миллий агентлигида Бутунроссия давлат кинематография институти (ВГИК)да таҳсил олишни истаган ўзбекистонлик абитурентлар учун онлайн тарзда имтиҳон ташкил этилди. ВГИКга қабул қилинадиган талабаларнинг ўқиши учун шартнома пуллари «Ўзбеккино» миллий агентлиги томонидан тўлаб берилади.

Имтиҳон Бутунроссия давлат кинематография институтининг профессор-ўқитувчилари томонидан масофавий тарзда ўтказилди. Унда 10 нафарга яқин абитуриент иштирок этди. Кинематография институтининг талаб ва қоидаларига амал қилган ҳолда ташкил этилган имтиҳонда абитуриентлар режиссёрлик, кинооператорлик ва драматургия йўналишлари бўйича онлайн имтиҳон топширди.

Аввалроқ, «Ўзбеккино» миллий агентлиги томонидан Бутунроссия давлат кинематография институти билан ҳамкорликда киномутахассислар тайёрлаш, шунингдек, мастер-класслар ўтказиш учун институт профессор-ўқитувчиларини жалб қилиш бўйича келишувга эришилганди.