Ўзбекистонда оксигенация ниқоби ва вентури клапани ишлаб чиқариш йўлга қўйилмоқда
Коронавирусга қарши кўрилаётган чораларни кузатаркансиз, ҳимоя воситалари алоҳида ўрин эгаллаётгани диққатингизни тортиши табиий. Шу ўринда юртимизда ҳам янги турдаги оксигенация ниқоби ва унга мослаштирилган вентури клапани ишлаб чиқиш йўлга қўйилаётгани қувонарлидир.
Коронавирусга қарши кўрилаётган чораларни кузатаркансиз, ҳимоя воситалари алоҳида ўрин эгаллаётгани диққатингизни тортиши табиий. Шу ўринда юртимизда ҳам янги турдаги оксигенация ниқоби ва унга мослаштирилган вентури клапани ишлаб чиқиш йўлга қўйилаётгани қувонарлидир.
Инновацион ривожланиш вазирлиги ҳузуридаги Ёшлар академияси вакили Фирдавс Неъматзода янги турдаги оксигенация ниқоби ва унга мослаштирилган вентури клапани ишлаб чиқди.
– Оксигенация ниқобига вентури клапани уланади ва бемор одамга тақилади, – дейди Ф.Неъматзода. – Унинг асосий вазифаси ўпкага кетаётган кислород оқимини ошириш ҳисобланади. Ишлаб чиқилган ниқоб дунё стандартига эга бўлган 22 миллиметрли найчага эга. Ниқоб универсал бўлиб, у ИВЛ, ингаляция, кислород билан тўйинтириш ва сунъий ҳаво бериш қурилмаларига уланиши мумкин ҳамда турли ўлчамда бўлади.
Маҳаллий ишлаб чиқилган бир дона вентури клапанининг ишлаб чиқилган прототипи нархи 10 минг сўм, оксигенация ниқобининг нархи 25 минг сўмни ташкил этади. Бугунги кунда оксигенация ниқоблари ва вентури клапанлари Ўзбекистонда ишлаб чиқарилмайди ва унга бўлган талаб кундан кунга ортиб бормоқда. Ҳозирда оксигенация ниқоби ва вентури клапанининг 3Д моделлари тайёрланди. Яқин кунларда лойиҳанинг биринчи прототипи ишлаб чиқарилади. Соғлиқни сақлаш вазирлиги вакиллари билан ҳамкорликда ишлаб чиқилган прототип стерилизация қилинади ва тажриба синовлари амалга оширилади. Тажриба синов натижаларига кўра, аниқланган камчиликлар бартараф этилгач, оксигенация ниқоби ва вентури клапанининг кичик синов партияси ишлаб чиқилади.
Шу билан бир қаторда бир марталик бактериал-вирус фильтрларига ҳам дунё миқёсида талаб ортиб бормоқда. Ушбу фильтрлар ИВЛ қурилмасига уланиб, ўта оғир аҳволдаги беморлар учун 8 соат давомида ишлатилади, ундан фақат бир марта фойдаланиш мумкин. Фильтрнинг вазифаси беморнинг ўпкасидан чиқаётган вирус ИВЛ қурилмасига кириб кетмаслигининг олдини олиш, негаки бу қурилмадан бошқа беморлар ҳам фойдаланади. Таъкидлаш жоизки, коронавирус билан чалинган беморларга ИВЛ қурилмаси фильтрсиз уланмайди, вирусланган қурилмани тозалаш эса жуда қўп вақтни олади.
Бактериал-вирус фильтрлар Ўзбекистонда ишлаб чиқарилмайди. Унинг нархи хорижда 5-6 АҚШ долларини ташкил этади. Ҳозирда Inspired Medical компаниясининг BSF201 фильтридан фойдаланган ҳолда 3Д сканер орқали унинг 3Д модели олинди ва 3Д принтер орқали чиқарилди. BSF201 фильтрининг таркибини ўрганиш учун Инновацион ривожланиш вазирлиги ҳузуридаги Илғор технологиялар марказига юборилди ва натижалар ўрганилди. Бактериал-вирус фильтрларини маҳаллийлаштирилган нархи ўртача 25 минг сўмни ташкил этади.