Пойтахтимизда “CARO – 2019” II Марказий Осиё радиоонкология конгресси ўз ишини бошлади.

“Марказий Осиёда жаҳон радиоонкология соҳасидаги ютуқларни ўзлаштириш тажрибаси ва истиқболлари” мавзуига бағишланган ушбу нуфузли тадбирда Ўзбекистон, Германия, Россия, Туркия, Америка, Швейцария, Беларусь, Грузия, Қозоғистон, Қирғизистон, Тожикистон, Туркманистон каби мамлакатлардан онколог ва физик-радиологлар иштирок этмоқда.

Конгресс очилишида Ўзбекистон Республикаси Соғлиқни сақлаш вазирининг биринчи ўринбосари Баҳодир Юсупалиев, Германиянинг мамлакатимиздаги Фавқулодда ва мухтор элчиси Гюнтер Оверфельд ва бошқалар икки давлат ўртасидаги ҳамкорликларнинг мустаҳкамланиб бораётгани тиббиёт йўналишида халқаро тажриба ва ютуқларни ўрганиш ҳамда амалиётга татбиқ этишда кенг йўл очганини, бунга эса Марказий Осиё радиоонкология конгрессининг Тошкентда ўтказилиши анъанага айланаётгани ёрқин мисол эканини таъкидлади.

– “CARO – 2019” Марказий Осиё радиоонкология конгресси ташкил этилиши юртимиздаги ислоҳотлар ижроси билан чамбарчас боғлиқ, – деди “OPASCA German Oncology Solutions GmbH” компаниясининг Тошкентдаги “OPASCA GOS Central Asia” шўъба компанияси бош директори Алексей Арапов. – Унда иштирокчилар замонавий нур терапиясининг истиқболларини муҳокама қилади, хориж тажрибаси ва Марказий Осиё мамлакатларида бу жараёндаги муаммолар таҳлил этилади. Дастурда юздан ортиқ маърузалар жамланган. Туркия, Америка, Швейцария, Беларусь давлатлари иштирокчилари бу йил сафимизга қўшилгани конгресснинг имкониятлари кенгайиб бораётганидан далолат бермоқда.

– Ушбу конгрессда қатнашиш мен учун шараф, – деди Германиядаги Штутгарт клиникаси профессори Марк Мюнтер. – Албатта, бунга Ўзбекистон ва Германия давлатлари раҳбарларнинг ташрифи ва унда эришилган келишувлар асосий сабабдир. Тиббиётдаги ўзаро ҳамкорликларни, хусусан, “OPASCA German Oncology Solutions GmbH” компаниясининг ташаббуси билан юртингизда амалга оширилаётган лойиҳани биз қўллаб-қувватлаймиз. Яна бир муҳим гап. Ўзбекистонни Германия халқи яқиндан танимоқда. Уларнинг юртингизда саёҳат қилишга иштиёқи баланд. Шу маънода ўтказилаётган конгресс биз ва хорижликлар учун яна бир имкониятдир. Эртага мен конгрессда инсонларда учрайдиган ўпка ўсмалари ва уларни даволашнинг замонавий усуллари ҳақида ўз тажрибамни иштирокчилар билан бўлишаман.

Эслатиб ўтамиз, ушбу конгресс Ўзбекистон Республикаси Соғлиқни сақлаш вазирлиги, Фанлар академияси, “Uventa Plus” компанияси, Германиянинг “OPASCA German Oncology Solutions GmbH” компанияси, унинг Тошкентдаги “OPASCA GOS Central Asia” шўъба компанияси ва бир қатор ташкилотлар билан ҳамкорликда ташкил этилмоқда.

Конгресснинг иккинчи кунги тадбири Тошкент вилоятида ўтказилади.

Насиба Зиёдуллаева, ЎзА.