ХХФнинг навбатдаги конгресси жорий йил 25-27 сентябрь кунлари Италия пойтахти Рим шаҳрида бўлиб ўтади. Юқоридаги фикрни РХФ ижрочи директори Дмитрий Курбатов Олий хоккей лигаси доирасида пойтахтимиздаги “Humo Arena” муз саройида ўтказилган дастлабки ўйинга ташрифи чоғида таъкидлаган. Эслатиб ўтамиз, мазкур учрашувда “Ҳумо” жамоаси “Рязань” клубини 5:0 ҳисобида тор-мор этди.

“Биз Халқаро хоккей федерациясининг аъзоси сифатида, Ўзбекистонни мазкур ташкилот аъзолигига қабул қилиш учун овоз берамиз, — дейди Курбатов. — Шунингдек, бу танловни ташкилотнинг бошқа аъзолари томонидан ҳам қўллаб-қувватланиши учун ҳаракат қиламиз”.

Унинг айтишича, Ўзбекистон ХХФнинг тўлақонли аъзолигига қабул қилинишига шубҳа йўқ. Бу воқеа мамлакат хоккейи тарихида янги саҳифа очади.

Ўзбекистон хоккей федерацияси 2013 йил октябрь ойи бошида тузилган. 2019 йил февралда беш йиллик танаффусдан сўнг мамлакат чемпионати тикланиб, мусобақада тўрт жамоа иштирок эта бошлади.

Пойтахтимизда кечган ОХЛнинг илк ўйинида, кутилмаганда Тошкентнинг “Ҳумо” жамоасини қўллаб-қувватлаш учун жуда кўп хоккей мухлислари келишди. Шу куни муҳташам “Humo Arena” деярли тўлгани мамлакатимизда қайтадан туғилган мазкур ажойиб спорт турига қизиқиш жуда юқори эканидан дарак беради.

Шу кунларда бу муҳташам мажмуа “Ҳумо”нинг яна иккита уй учрашувига мезбонлик қилади. 13 сентябрь куни жамоамиз Қозоннинг “Барса” клубини, 15 сентябрда эса Нижний Новгороднинг “Торпедо-Горький” клубини қабул қилади. Умид қиламизки, дебоча муваффақият давомли бўлади.