Томонлар эътиқод эркинлиги, динлараро ва конфессиялараро тотувликни таъминлаш соҳасида ҳамкорлик қилиш юзасидан фикр алмашди. Ўзбекистонда виждон ва эътиқод эркинлигини таъминлаш бўйича кўрилаётган чора-тадбирларга ижобий баҳо берилди.

Виждон эркинлигини мустаҳкамлашни давом эттириш вазифалари Ҳаракатлар стратегиясида ўз аксини топиб, хавфсизлик, миллатлараро тотувлик ва диний бағрикенгликни таъминлашга ҳамда чуқур ўйланган, ўзаро манфаатли ва амалий ташқи сиёсат олиб боришга қаратилган мақсадлар назарда тутилган.

2018 йилда Олий Мажлис томонидан БМТ Махсус маърузачиси тавсияларини инобатга олган ҳолда эътиқод эркинлигини таъминлаш бўйича “Йўл харитаси” қабул қилинди, қонун ҳужжатларининг эътиқод қилувчилар ҳуқуқларини таъминлашга доир қисмини инсон ҳуқуқлари соҳасидаги халқаро стандартларга мослаштириш бўйича иш олиб борилмоқда.

Эътиқод эркинлигини таъминлаш соҳасида чинакам муваффақиятга эришиш сиёсий-ҳуқуқий ислоҳотларнинг муҳим қисми сифатида кўриб чиқилмоқда. Биринчи навбатда, дин соҳасидаги миллий қонун ҳужжатларини такомиллаштириш ва эркинлаштиришга қаратилмоқда. Диний адабиётларни тайёрлаш, олиб кириш ва тарқатиш учун рухсат олиш тартиб-таомиллари соддалаштирилди. Диний ташкилотларни давлат томонидан рўйхатга олиш тартиби қўшимча равишда мақбуллаштирилди. “Виждон эркинлиги ва диний ташкилотлар тўғрисида”ги қонун 20 йил деганда илк бор қайта кўриб чиқилмоқда. Ўзбекистон бу жараёнга халқаро экспертларни жалб қилган.

Ўзбекистоннинг дин соҳасидаги сиёсати конфессиялараро мулоқотга йўналтирилгани ва диний бағрикенгликни назарда тутиши таъкидланди.

Учрашувда томонлар эътиқод эркинлигининг долзарб масалалари юзасидан мулоқотни давом эттиришга тайёр эканини билдирди.