Ушбу тадқиқотда мазкур ҳудудда олиб борилган археологик изланишларда қўлга киритилган 524 та қадимги инсон қолдиқлари (скелетлари) архео-генетик таҳлил қилинган. ДНК-таҳлиллари қилинган қадимий скелетлар қаторида Ўзбекистоннинг олтита археологик ёдгорлигидан топилган инсон қолдиқлари ҳам жой олган.

Тирик организмларда генетик кодни, яъни ирсий белгиларни сақлаш ва наслдан-наслга ўтказиш вазифасини бажарадиган ДНК (дезоксирибонуклеин кислотаси) инсон суякларида узоқ вақт сақланиб қолиши аниқланган бўлиб, уларни таҳлил қилиш орқали теран ўтмишни янги маълумотлар билан ёритиш археологиянинг энг замонавий йўналишидир. Бундай тадқиқотлар кенг илмий жамоалар томонидан амалга оширилади, чунки бу изланишлар дала қазишмаси, лаборатория таҳлили ва натижаларни талқин қилиш босқичларини ўз ичига олади. Жаҳоннинг 80 дан ортиқ нуфузли илмий марказларидан 117 нафар тадқиқотчиларини бирлаштирган мазкур изланишда Ўзбекистон Республикаси Фанлар академияси Археологик тадқиқотлар институти археологлари ҳам қатнашган.

Сўнгги 200 йилдан бери ўз ечими кутаётган Турон (Ўрта Осиё) ва Шимолий Ҳиндистон аҳолисининг келиб чиқиши муаммосига ушбу изланиш ойдинлик киритди. Тадқиқот натижаларига кўра, мазкур ҳудуд аҳолисининг шаклланишида Евросиё даштлари аҳолиси асосий ўрин тутган.

Бу тадқиқотда Евросиё бўйича тўпланган қадимий ДНК қолдиқлари Ҳарвард университети лабораториясида таҳлил қилиниб, генетик натижалар археолог ва тилшунос олимлар билан ҳамкорликда ўрганилган илк тадқиқотдир.

Маълумот ўрнида, “Science” (ўзбекча Саенс, инглизчадан маъноси — “Фан”) Фанни ривожлантириш Америка ассоциациясининг илмий журналидир. “Nature” (“Табиат”) журнали билан бир қаторда жаҳоннинг энг нуфузли журнали саналади. Журнал жиддий тақриз қилиниб, бир ҳафтада бир маротаба чоп этилади, қоғозли вариантига 130000 обуначи, электрон вариантига 1 миллион обуначи бор. Инглиз тилида чоп этилади, маркази Вашингтон (Колумбия тумани, АҚШ) ва Кембрижда жойлашган (Буюк Британия).