Ўзбек тили билан боғлиқ тадбирлар мунтазам ўтказиб турилиши лозим
“UNICON.UZ” ДУКда корхона ходимлари, ижодкорлар иштирокида ташкил этилган давра суҳбатида юқоридаги каби кўплаб фикрлар билдирилди.
Мамлакатимизда 21-октябрь – Ўзбек тили байрами куни муносабати билан кўплаб маънавий-маърифий тадбирлар, учрашувлар ўтказилди. Бу байрамнинг шукуҳи ҳали юртимизни кезиб юрибди. Аслида ўзбек тили билан боғлиқ тадбир, учрашув, шеърхонлик кечалари йил давомида, мунтазам ўтказиб турилиши лозим.
Президентимизнинг 2020 йил 20 октябрдаги “Мамлакатимизда ўзбек тилини янада ривожлантириш ва тил сиёсатини такомиллаштириш чора-тадбирлари тўғрисида”ги фармони ва 19 октябрдаги “Буюк шоир ва мутафаккир Алишер Навоий таваллудининг 580 йиллигини кенг нишонлаш тўғрисида”ги қарори қабул қилинганини халқимиз катта мамнунлик билан қабул қилди.
Она тилимизнинг бугун дунёдаги йирик тиллардан бирига айланиб бормоқда. Буни ҳозирги вақтда жаҳонда ўзбек тилида сўзлашувчилар сони 50 миллион кишига яқинлашганида ҳам кўриш мумкин.
Бугун “UNICON.UZ” ДУКда корхона ходимлари, ижодкорлар иштирокида ташкил этилган давра суҳбатида юқоридаги каби кўплаб фикрлар билдирилди. Давра суҳбатида “UNICON.UZ” давлат унитар корхонаси директор ўринбосари Сувон Нажбиддинов, филология фанлари доктори, адабиётшунос олим Бибиробия Ражабова, истеъдодли шоир Шодмонқул Салом иштирок этди.
Шоир Шодмонқул Саломнинг ватан, тинчлик, муҳаббат мавзусидаги шеърлари учрашув иштирокчиларига ўзгача кўтаринки кайфият улашди.